Нийгмийн даатгалын байгууллага нь 1.1 сая даатгуулагч, 45 мянган ажил олгогчид өргөн цар хүрээтэй үйлчилгээ үзүүлдэг. Иргэд даатгуулагчид нийгмийн даатгалын үйлчилгээ, хуулийн зөвлөгөө, мэдээлэл авах хүсэлтэй ч цаг завгүйн улмаас хойшлуулсаар, тусламж үйлчилгээ авах боломжоо хязгаарласаар байдаг.
Тэгвэл нийгмийн даатгалын үйлчилгээг явуулын байдлаар зохион байгуулж, даатгуулагчиддаа хүрч үйлчилж эхэллээ. Нийгмийн даатгалын “явуулын үйлчилгээ”-ний нээлт өнөөдөр /2019.03.27/ Хархорин захад болж иргэдэд нээлттэй ажиллалаа.
Энэ үеэр сайн дурын даатгалын гэрээ байгуулах, шимтгэл төлөх, “Нийгмийн даатгал” аппликэйшний бүртгэл баталгаажуулах, хууль эрх зүйн зөвлөгөө болон нийгмийн даатгалын бүх төрлийн мэдээлэл авахаар олон иргэд хандаж байсан бөгөөд төрийн үйлчилгээг хялбаршуулсан, үр дүнтэй ажил болж байна хэмээн сайшааж байсан юм.
СХД-ийн 10-р хорооны иргэн Ж.Өлзийбаяр: Төрийн үйлчилгээг хялбар хүргэж байгаад баяртай байна. Иргэн бидэнд хүрч үйлчилж байгаа энэ шинэ ажлыг дэмжиж байна.
СХД-ийн 6-р хорооны иргэн Б.Батцоож: Эхнэр маань энэ жил тэтгэвэрт гарна. Юу бүрдүүлж яаж тэтгэврээ тогтоолгох тухай сайн мэдэхгүй байсан юм. Одоо л эндээс асууж авъя гэж бодоод явж байна.
СХД-ийн 2-р хорооны иргэн Ж.Баасансүрэн: Сайн дурын даатгалын талаар тодруулж мэдээлэл авлаа. Явуулын үйлчилгээ их зүгээр юм. Хэрэг болгож очих завгүй явсаар байдаг, ингээд өөрсдөө ирээд зөвлөөд үйлчилж байгаа нь сайшаалтай.
Нийгмийн даатгалын “явуулын үйлчилгээ” нь малчны хот, худалдаачны лангуу, ажилтны ажлын байранд хүрч үйлчлэх бөгөөд цаашид нийслэлд 7 хоногт 2 удаа, аймагт сар бүр нэг удаа тогтмол зохион байгуулагдана.
