Эрхэм хүндэт ажил олгогч, даатгуулагч, хамтран ажиллагч төрийн болон төрийн бус байгууллага, олон улсын байгууллагын хамт олон та бүхэнд сар шинийн мэнд хүргэе. Нийгмийн даатгалын байгууллага өнгөрөгч Хонин жилдээ нийгмийн даатгалын тухай хууль тогтоомжийг хэрэгжүүлж, нийгмийн даатгалын сангийн орлогын төлөвлөгөөг 94,6 хувиар биелүүлж, зарлага санхүүжилтийг цаг хугацаанд нь олгож, нийт 43 мянган ажил олгогчийг нийгмийн даатгалын шимтгэл төлөгчөөр бүртгэн, 1.0 сая гаруй иргэдийг нийгмийн даатгалд даатгууллаа.
Төрөөс тэтгэврийн шинэчлэлийн талаар баримтлах бодлого, шинэчлэн батлагдсан Эрүүл мэндийн даатгалын тухай хууль, Нийгмийн даатгалын тухай хууль тогтоомжид орсон нэмэлт өөрчлөлтүүд, Ажилласан жил, тэтгэврийн даатгалын шимтгэлийг нөхөн тооцох тухай хуулийг хэрэгжүүлэх ажлыг 2015 онд зохион байгууллаа. Нийгмийн даатгалын үйлчилгээг ажил олгогч, даатгуулагч (иргэд)-д шуурхай хүргэх зорилгоор тус газар болон нийслэлийн Хан-Уул дүүргийн нийгмийн даатгалын хэлтэс, Дорнод аймгийн нийгмийн даатгалын хэлтэст ISO 9001 стандартад нийцсэн чанарын удирдлагын тогтолцоог нэвтрүүлэх нөр их ажлыг амжуулж, улмаар олон улсын Хонконг Веритас байгууллагаас чанарын удирдлагын тогтолцоо нэвтрүүлсэн батламжийг 2016 оны 01 дүгээр сард гардан авснаар төрийн үйлчилгээний байгууллагаас анхдагч болсныг дуулгахад таатай байна.
Өнгөрөгч жилд нийгмийн болон эрүүл мэндийн даатгалын шимтгэлийг цахимаар төлөх, гадаад улсад оршин сууж буй Монгол Улсын иргэдийг нийгмийн сайн дурын даатгалд цахимаар даатгуулах үйлчилгээг нэвтрүүлж, ажил олгогчид зориулсан Итгэлийн аяныг зохион байгуулсан, үйлдвэрлэлийн ослоос урьдчилан сэргийлэх цуврал сургалтыг бүсчлэн зохион байгуулсан зэрэг ажил олгогч, даатгуулагчид чиглэсэн олон ажлыг бид анх удаа хэрэгжүүллээ.
Бид өнгөрөгч 2015 оны ажлын амжилтанд тулгуурлан, Монгол Улсын өнцөг булан бүрт ажиллаж буй нийгмийн даатгалын байцаагч, ажилтны хичээл зүтгэлд түшиглэн, даатгуулагчийн итгэл найдвар, сэтгэл ханамжаар үнэлэгдэх үйлчилгээг хүргэх зорилгоор 2016 оныг “Ажил олгогч, даатгуулагчийг дэмжих” жил болгон зарлан ажиллахаар болж, олон ажлыг хэрэгжүүлэхээр төлөвлөж байна.
Нийт даатгуулагч(ажил олгогч) та бүхэндээ XVII жарны гал бичин жилийн сар шинийн мэндийг хүргэж, өнгөрч буй жилийн өлзий буян тань арвижиж, айлчилж буй жилийн аз хийморь ивээн, ураг төрлөөрөө урт насалж, удаан жаргахын өлзийтэй ерөөлийг өргөн дэвшүүлье.
НИЙГМИЙН ДААТГАЛЫН ЕРӨНХИЙ ГАЗРЫН ДАРГА
ДУЛАМСҮРЭНГИЙН МЭНДБАЯР
