Байгууллагын тухай

                                                        БАЙГУУЛЛАГЫН ТУХАЙ

Сайд нарын Зөвлөлийн 1976 оны 149 дүгээр тогтоолоор Улаанбаатар хотын Гүйцэтгэх захиргаанд Хөдөлмөр, нийгмийн хангамжийн хэлтсийг байгуулахаар шийдвэрлэснээр Сүхбаатарын районы Нийгэм хангамжийн хэлтэс байгуулагдсан түүхтэй. 1990 онд Тэтгэврийн хууль, 1991 онд Нийгмийн даатгалын шимтгэлийн  болон Тэтгэмжийн тухай хууль, 1993 онд Иргэний эрүүл мэндийн даатгалын тухай  хуулиуд тус тус батлагдан мөрдөгдөж, Монгол Улсын Засгийн газрын 1990 оны 220 дугаар тогтоолоор нийгмийн даатгалын бодлого, үйл ажиллагаа, хуулийн хэрэгжилт, орлого оруулах чиг үүргийг нийгмийн хангамжийн газарт төвлөрүүлсэн нь одоогийн шинэ тогтолцоог бүрдүүлэх угтвар нөхцөлийг хангасан юм.

Монгол улсын Засгийн газрын 1992 оны 25 дугаар тогтоолын дагуу Засаг захиргааны нэгжийн өөрчлөлтөөр Чингэлтэй дүүрэг байгуулагдахад тус хэлтсээс өрх тусгаарлан Сүхбаатар дүүргийн Хүн амын бодлого хөдөлмөрийн хэлтэс болж өөрчлөгдөж тэтгэвэр, тэтгэмжийн хөрөнгийн зарцуулалт, иргэдэд үзүүлэх нийгмийн хангамжийн үйлчилгээний чанарыг сайжруулах, хөдөлмөрийн нөөц, ажиллах хүчний бодлогод хяналт тавихад гол зорилгоо чиглүүлэн ажиллаж байжээ.

Нийгмийн даатгалын багц хууль 1994 онд батлагдаж “Нийгмийн даатгалын тухай хуулиудыг хэрэгжүүлэх талаар авах арга хэмжээний тухай” Засгийн газрын 1994 оны 171 дүгээр тогтоолоор Хүн амын бодлого хөдөлмөрийн харьяа Улсын нийгэм хангамжийн газрыг Улсын нийгмийн даатгалын ерөнхий газар болгон зохион байгуулж 1994 оны 10 дугаар сараас аймаг, нийслэлийн нийгмийн даатгалын газар, хэлтсийг  1995 оноос хэрэгжих хуулийн дагуу Нийгмийн даатгалын хэлтэс гэж нэрлэх болсон.

Тус хэлтэс нь Санхүү бүртгэлийн,  Үйлчилгээний, Орлого шимтгэлийн, Хяналт шалгалт, дотоод аудитын гэсэн 4 тасагтай 58 ажилтан, албан хаагчидтай үйл ажиллагаа явуулж байна. Албан хаагчдын 74  хувь нь нягтлан  бодогч, эдийн засагч, санхүүгийн  болон бизнесийн менежмент, 12 хувь нь эрх зүйч,10 хувь нь багш, 5 хувь нь эмч, магистрын зэрэгтэй 11, хоёр буюу түүнээс дээш мэргэжилтэй 17  албан хаагч  байна. 2019 онд нийгмийн даатгалын  болон эрүүл мэндийн даатгалын сангийн орлогын 107.4 хувиар, 2020 онд нийгмийн даатгалын болон эрүүл мэндийн даатгалын сангийн орлогын төлөвлөгөөг 108.5 хувиар,  2021 онд нийгмийн даатгалын  болон эрүүл мэндийн даатгалын сангийн  орлогын төлөвлөгөөг 115.0 хувиар тус тус давуулан биелүүлсэн  амжилттай байна.